ቤዛ (ቀዳማይ ክፋል)

ቤዛ (ቀዳማይ ክፋል)

ዎ ንገዛእቲ ጸልማት ዘዕነኻ፡ በቲ ዘይጠፍእ ብርሃን ሓደ ወድኻ ኸኣ ዝመላእካና ቅዱስ ኣቦ ስምካ ይባረኽ። ንስኻ በይንኻ ኢኻ፡ ንዓኻ ዝመስል ከኣ ሓደ እኳ የልቦን። ንወድኻ ምእንቲ ኩላትና ኣኅሊፍካ ደኣ ሃብካዮ እምበር ኣይነሓፍካዮን፡ ንሕና ኸኣ በዛ ቅድስቲ ግብሪ እዚኣ ሕይወት ረኸብና። ልዕሊ ኹሉ ንስኻ ኣብ ልብና ክትነግስ ብስም ኢየሱስ ክርስቶስ ንጽውዓካ ኣሎና። ጐይታና ኢየሱስ ክርስቶስ ሊቀ ካህናትና ንምዃን ብስጋን ደምን ከማና ሰብ ኰንካ፡ ንስኻ በይንኻ ኣብ የማን ኣቦ ዀንካ ክትዓርቀና እትኽእል መድኃኒና ኢኻ። ብዘሎ ምስጋና፡ውዳሴ፡ ዕልልታ ኾነ ጭብጨባ ንዓኻ ንበይንኻ ይግባእ። ሎሚ ውን ደምካ ሕያው’ዩ እሞ ዎ ጐይታ ብጸጋኻ ርድኣና። ጐይታ መንፈስ ቅዱስ ንኹለንትናና ግዛእ፡ ንስኻ ብእትደልዮ መገዲ ጥራይ ምርሓና። ከምታ ዝፈረሰት መቅደስ ኣምላኽ ግን ከኣ ብዘመን ዘሩባብኤል ብኃይልኻን ብርትዐኻን ዝተሓደሰት፡ ሎሚ ንዝፈረሰ፡ ምድረበዳ ንዝኾነ ሕይወት ክትሕድስ፡ መንፈስካ መሊእካ ንስም እግዚኣብሔር ዝውድስ ዓቢ ጭፍራ ክትገብሮ ብስም ኢየሱስ ክርስቶስ ንልምን ኣሎና። ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን።

እሜጡ ነፍስየ ቤዛ ኣባግዕየ

ንሕይወተይ ከኣ በጃ እተን ኣባጊዕ አኅልፋ ዮሃ10፡15

ሰላም ጐይታና ኢየሱስ ክርስቶስ ምሳኻትኩም ይኹን ክቡራት ኣኅዋተይን ኣኃተይን። እቲ ኣብ ሰማያዊ ስፍራ ብክርስቶስ ኢየሱስ ኣቢሉ ብመንፈሳዊ በረኸት ዝባረኸና ኣቦ ይባረኽ። ኣብ ዝኃለፉ መዓልታት ንነገረ-ቤዛነት ዝምልከቱ ገለ ሕቶታት ሓቲተ ነይረ፡ ነፍሲ ወከፍና ክንምርምሮ ሸለል ውን ክንብሎ ዘይግበኣና ዛዕባ እዩ’ሞ ከነተኲረሉ እላቦ። ልብታትና እንታይ ዓይነት መልሲ ሂቦምና፧ ርጡብን እርኑብን መልሲ ’ዶ፧ ወላስ ዝተዘርገ፡ ዘይተመምየ፡ ዘይጸረየን፡ ዝተመናንሀን መልሲ፧ በሉ ንዑ ሓቢርና መንፈስ ቅዱስ ንዝመሃረና ትምህርቲ ካብ ዔላ መጽሓፍ ቅዱስ ሓንፊፍና ንስተዮ።

ንመጀመሪ ምእንቲ ኽኾነና፡ ትርጉም ናይዚ ዝበሃል ዘሎ ቃል፡ ማለት ቤዛ ዝገልጹ፡ ዘብርሁ መወከሲታት ንመልከት።

1.     ቤዛ፦ ዋጋ፡ ካሕሳ፡ መተካእታ፡ ዋሕስ፡ መድኅን (መዝገበ ሰዋስው ወግስ፡ አለቃ ኪዳነ ወልድ ክፍሌ)

2.    ቤዛ፦ ዝተታሕዘና ወይ ውን ዝተወሰደና ነገር ንምምላስ ዝኽፈል ዋጋ፡ካሕሳ፡ መለወጢ እዩ(የመጽሓፍ ቅዱስ መዝገበ ቃላት)።

3.    ቤዛ፦ ስለ ሓደ ዕላማ፡ ሰብ ወይ ነገር ኢሉ ሕይወቱ ዝሃበ ወይ ዘጥፍአ (ዘመ.መዝገበ ቓላት ትርግኛ ብተክአ ተስፋይ)።

እምበኣር ክቡራት ነበብቲ እዚ ጽሑፍ፡ ብመጠንቲ ‘ቲ ኣምላኽ ዝገለጾ ሓቂ፡ ብዛዕባ ነገረ ቤዛነት ምእንቲ ክንርዳእ ንኣእምሮና ንኽፈቶ። ካብ ዘፍጥረት ምዕራፍ 1 ክሳዕ ራእ 22 ብዝርዝር ዝተገልጸ እዩ። ንእኡ ምፍላጥን ምእማንን ውን ናይ ዘለኣለም ሕይወት ዘውህብ እዩ። ነገረ ቤዛነት እቲ ዝዓበየ ዛዕባ እግዚኣብሔር እዩ። ንነገረ ቤዛነት ምትሕውዋስ፡ ምድብላቅ፡ ብንጹርን ግሁድን መገዲ ዘይምፍላጥን፡ ኣሜን ዘይምባልን መፈጸምታኡ ናይ ዘለዓለም ሞት እዩ።

እሜጡ ነፍስየ ቤዛ ኣባግዕየ፡ ንሕይወተይ በጃ እተን ኣባጊዕ አኅልፋ ዚብል ሕያው ቃል ጐይታ ኣብ ከብሒ ልብና ነቐምጦ፡ አረ ተነፋዕናስ ከኣ ኣብ ማኅደር ልብና ንውቀሮ። ቤዛ ዚብል መግለጺ ንመን’ዩ ዝምለከት፧ ንምንታይ’ከ እዮም ቅዱሳት መጻሕፍቲ(መጽሓፍ ቅዱስ) ንእግዚኣብሔር ኣቦን ንእግዚኣብሔር መንፈስ ቅዱስን ቤዛ ኢሉ ዘይጸውዖም፧ ዎ ሕዝበይ ነቲ ንኣሻዕ ሳዕ ኣሻሕ ዓመታት ዝጠበቐና መንቅብ፡ ኢመጽሓፍ ቅዱሳዊ ኣስተምህሮ ካብ ሱሩ ክንምሕዎ ንጋደል። ጸጋ ጐይታ ኢየሱስ ክርስቶስ ምስ ኩላትና ይኹን። ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን።

ሓንቲ እንዳእቲ 5ይን ናይ መፈጸምታን ክፋል

ሓንቲ እንዳእቲ 5ይን ናይ መፈጸምታን ክፋል

ዎ እግዚኣብሔር ጐይታ ሠራዊት ንስኻ በይንኻ፡ ንዓኻ ዝመስል ውን ሓደ እኳ የልቦን። ብዘደንቕ ጥበብ፡ ንጥበብ ጠቢባን ዘጥፋእካ፡ ንምስትውዓል እቶም ጠቢባን ውን ዕሽነት ዝገበርካ ንስኻ ኢኻ። ነቶም ዘወትር ንዓኻ ዝደልዩ ብሰብ ዝተናዕቑ ግን ጥበቦም ዝኾንካ ጐይታ ኢየሱስ ክርስቶስ ስምካ ይባረኽ። ከምቲ ቕዱሳት መጻሕፍቲ ዝብልዎ ኢየሱስ ምእንቲ ኃጢኣተይ ሞትካ፡ ተቐበርካ’ውን ከምቲ ቕዱሳት መጻሕፍቲ ዝብልዎ ውን ካብ ምውታት ተንሳእካ፡ እዚ እቲ ብልበይ ዝኣመንክዎን ዝተቐብልክዮን ዝደኃንኩሉን እምነተይ እዩ። ኣምላኽ ንኢየሱስ ካብ ምውታን ከም ዘተንስኦ ኣሚነ እየ እዚ ኸኣ ናይ ዘለዓለም ሕይወት እዩ። ነቲ ኽቡር ዝኾነ ሊቀ ካህናትና ሎሚ ውን ምስጋና ይኹኖ። ንሱ መርሖ ሰማያት፡ ናብ ኣቦ ዘብጽሕ ፍኖት(መገዲ) እዩ። መንፈስ ቅዱስ ንነፍሳትና እትሕሉ ክቡር መንፈስ ብመጠን ጸጋኻ ንነፍሳትና ሓሉ፣ ነቲ ዝኣመንናዮን ዝደኃንናሉን ወንጌል ክሳዕ መፈጸምታ ኣጽኒዕና ክንሕልዎ ዘየቋርጽ ጸጋኻ ይርድኣና። ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን፣ኣሜን። 

እግዚኣብሔር ንሙሴ ከምዚ በሎ፦ “ንደቂ እስራኤል ከምዚ ኢልካ ተዛረቦም፦ ‘ናብታ ኣነ ዝህበኩም ምድሪ ምስ ኣቶኹም፡ ዓጺድ ክትዓጽዱ ከለኹም፡ ካብቲ ቐዳማይ ዓጺድኩም ሓንቲ እንዳእቲ ናብ ካህን ኣምጽኡ። ኣነ እግዚኣብሔር ምእንቲ ክቕበለልኩም ከኣ፡ እቲ ካህን በታ ድኅሪ ሰንበት ዘላ መዓልቲ ነታ እንዳእቲ ኣብ ቅድመይ እናወዝወዘ የቕርባ ዘሌ23፡9-11። 

ኣይትታለሉ ሕማቕ ዕርክነት ንጽቡቕ ልማድ የበላሽዎ እዩ 1ቆሮ 15፡33

ኣብ ዝሓለፉ ክፋላት ብዛዕባ ምውዝዋዝ ‘ታ ሓንቲ እንዳእቲ ብመንጽር ቅዱሳት መጻሕፍቲ ርኢና ኔርና። እዚ ዓቢይ ምሥጢር እዚ ኸኣ ክሳዕ ክንድ ምንታይ ናይ ሕይወትና መርሕ ምዃኑ ክንግንዘብ ይግበኣና እዩ። ኣብ ከውሒ ዘይተሰረተት ቤት ምዕናዋን ምፍራሳን ዘይተርፍ እዩ። እምነትና ውን ኣብ ቅኑዕ፡ መጽሓፍ ቅዱሳዊ ትምህርቲ እንተዘይተሰሪታ ንፋሳት ምስ ነፈሱ፡ ወሓይዝ ምስ ወሓዙ፡ ክትቐውምን ሕያው ኮይና ፍረ ክርከባ ኣይከኣልን እዩ። ከም መዛዘሚ ናይዚ ጽሑፍ’ዚ እቲ ነታ ኣብ ቆሮንቶስ ዝነበረት ናይ ኣምላኽ ቤተክርስቲያን ዝተጻሕፈ ለበዋን ስምዕታን ክንርኢ ኢና። እግዚኣብሔር መንፈስ ቅዱስ ጥበብን ምስትውዓልን ይዓድለና።

 ኣብ ቆሮንቶስ ዝነበረት ቤተክርስቲያን ብስብከት ሓዋርያ ቅዱስ ጳውሎስ ከም ዝተመስረተት መጽሓፍ ቅዱስ ዝነግረና ሓቂ እዩ። ሓዋርያ ኣብ ቀዳመይቲ መልእኽቱ ኣብ ምዕራፍ 15፡1 ዕላማ ጽሑፉ ብግህዶ ከምዚ እናበለ ይጽሕፈሎም፦ ሕጂ ኸኣ ኣኅዋተየ፡ ነቲ ኣነ ዝሰበኽኩልኩም ወንጌል ከዘክረኩም እደሊ ኣሎኹ። ንሱ ድማ እቲ ዝተቐበልኩምዎን ብእኡ ድማ ጸኒዕኩም እትነብሩ ዘሎኹምን እዩ። ቅዱስ ጳውሎስ ንምንታይ ኮን እዩ ነቲ ኣቐዲሙ ዝሰበኸሎም ወንጌል ከዘክሮም ተገዲዱ፧ ብዛዕባ ትንሳኤ ክርስቶስ ዳግም ንቤተክርስቲያን ምጽሓፍ ኣገዳስነቱ እንታይ’ዩ፧ ዚብሉ መሠረታዊያን ሕቶታት ምስ እነልዕል። እቲ ሓዋርያ ከምዚ እናበለ ምምለሰልና “ ገሊኦም ካባኻትኩም ትንሣኤ ሙታን የልቦን ዚብሉ ኣለዉ”። ምእንትዚ ኸኣ እቲ ሓዋርያ፡ ካብቲ ንሱ ኾነ ካልኦት ሓዋርያት ዝመሃርዎ ትምህርቲ ወጻኢ፡ ነቲ ኣቐዲሙ ዝተሰብከሎምን ዝኣመንዎን ወንጌል ኢየሱስ ክርስቶስ ብምሕዳግ ትንሣኤ ምውታን የልቦን ዝብል (ካልእ ወንጌል) እምነት ኣብ ልቦም ስለ ዘንበረኡ እዩ። እዞም ሰባት እዚኦም ኣብ ኅብረት ቤተክርስቲያን ቆሮንቶስ ዝርከቡ እኳ እንተኾኑ፡ ትንሣኤ ሙታን ዘይኣምኑ እዮም። ኣብታ ናይ ቆሮንቶስ ቤተክርስቲያን ብህላዎም ጥራይ ንኣምላኽ ዝፈልጡ ሰባት እዮም ተባሂሉ ስለኦም ኣይተጻሕፈን። ንኣምላኽ ዘይፈልጥዎ ግን ከኣ ኣብ ቤተክርስቲያን ዘለዉ ሰባት ምዃኖም ሓዋርያ ቅዱስ ጳውሎስ ብግህዶ ይገልጽ፡ እዚ ኸኣ ኅፍረት እዩ። ሕማቕ ዕርክነት ንጽቡቕ ልማድ የበላሽዎን ከም ዘይነበረ’ውን ይገብሮ እዩ። “ መን ምዃንካ ክነግረካስ ምስ መን ከም እትኸይድ ንገረኒ” ዝበሃል ብሂለ ኣበው ውን ተመሳሳሊ ሓሳብ ኣለዎ። “ጽባሕ ክንመውት ኢና ሎሚ ንብላዕ ንስተ” ዝብል ሓሳብ ድኅሪ ሞት ሕይወት ከም ዘየልቦ ዝድምድም ብሂል እዩ። እዚ ኸኣ ነታ ኣብ ከውሒ ዘይተሃንጸት ቤት ከዕኑ ዝኽእል ብርቱዕ ንፋስ እዩ። ዕላማ ጽሑፍ ቕዱስ ጳውሎስ ናብቲ ናይ ጥንቲ “ትምህርቲ ክርስቶስ”  ምእንቲ ክምለሱ እዩ። ምኽንያቱ ገሊኦም ካብቲ ዝመሃሮም ትምህርቲ ወጻኢ ብምኻዶም ንሕይወቶምን፡ ሕይወት ካልኦትን ኣብ ሓደጋ ስለ ዘውደቁ እዩ። 

ንሕና’ኸ ካብዚ ወቐሳን ሕፍረትን ነምልጥ’ዶ ንኸውን። እታ ኣብ ልብና ዘላ እምነት ከምቲ ዝተሰበኸልናን ዝተቐበልናያን ድያ ዘላ ወይስ ብኻልኦት ዝተፈብረኹ ትምህርታት ተሓዋዊሳ’ያ ዘላ፧ ብዙሓት ኣብ ቤተክርስቲያን ኣሎና እናበሉስ ሕቶ ትንሣኤ ሙታት ኣብ ዝለዓለሉ እዋን “ እንድዒ፡ ኣምላኽ ይፈልጥ፡ ሽዑ ንርእዮ፡ እንሓንሳእ ውን ምስ ሞትና ነርክበሉ” ዚብሉ ቓላት የውክዑ። ናይ ክርስቶስ ኢየሱስ ቤተክርስቲያን ብዛዕባ ትንሳኤ ሙታን ንጹር ትምህርቲ እንተዘይሒዛ፡ መፈጸምታኡ ንኣምላኽ ዘይትፈልጥ፡ ብደም ክርስቶስ ከም ዝነጽሐት ዝረስዐት፡ ብብርቱዕ ንፋሳት ዝዓነወት ቤት እያ እትኸውን። ብዛዕባ ትንሳኤ ኢየሱስ ክርስቶስ ንጹር እምነት ዘይሓዘ ሰብ ከቶ ውን ብዛዕባ ትንሳኤ ገዛእ ርእሲ ርግጸኛ ክኸውን ኣይክእልን እዩ። ብዘይካ እቲ ካብ ሰማያት ዝወረደ፡ ምእንቲ ኃጢኣትና ዝሞተ፡ ዝተቐብረ ቕዱሳት መጻሕፍቲ ከም ዝመስከርዎ ውን ካብ ምዉታት በኹራት ኮይኑ በይኑ ዝተንስአ ኢየሱስ ክርስቶስ ካልእ ሓደ’ኳ ከም ዘየለ ዘይኣመነ ልቢ ንመልሕቑ ኣብ እዋን ማዕበል ዝሓደገ  ሰብ እዩ። ነቲ ብቕዱሳን ሓዋርያት ዝተሰብከልና ወንጌል ደጊምና ንዘክሮ፡ ካብኡ ዝዘንበሉ ኩሎም ትምህርታት ብሕዳግ ውን ናብቲ ዝተሰብከልና ሓቐኛ ወንጌል ንመለሰ፡ ንእኡ ውን ኣጽኒዕና ንሓዞ። ኣይትታለሉ!!! ኣምላኽ ንክርስቶስ ከም ዘተንስኦ ነቶም ብክርስቶስ ኣሚኖም ዝሞቱ ኹሎም ብኽብሪ ኣብ ካልኣይ ምጽኣቱ ከተንስኦም እዩ። ኣምላኽ ንብዘሎ ዓጺድ ተቐቢልዎ እዩ፡ እቶም ብደም ክርስቶስ ዝተወለድና፡ ብኽብሪ ንጐይታና ምእንቲ ኽንመስል ካብ ክብሪ ናብ ክብሪ ክንልወጥ ኢና። ስለ ኹሉ ነገር ንእግዚኣብሔር ኣቦ ስብሐት ይኹን። 

ሊቀ ካህናት ኢየሱስ ክርስቶስ ሎሚ ውን  ብደሙ ምእንቲ ክሓጽበና  ደሙ ሕያው’ዩ። ደሙ ኣብ ቕድሚ ኣምላኽ ዝጠርዕ፡ ካብ ደም ኣቤል ንላዕሊ ብምሕረት ዝዛረብ’ዩ እሞ ብእምነት ብልብና ንጸውዓዎ።  ነቶም ዝተቐበልዎ ዘበሉ ዉሉድ ኣምላኽ ክኾኑ መሰል ዝህብ ክርስቶስ፡ ሎሚ ውን ሕያውን ዝዓዪን እዩ እሞ ብልብና " ኦ ጐይታ ኢየሱስ ክርስቶስ ብደምካ ሕጸበኒ" እናበልና ንጸውዓዮ። ኢየሱስ ክርስቶስ ማእሰር ኃጢኣትና ክበትኽ ብቕዓት ዘለዎ፡ ብደሙ ክሓጽበና (ዝሞተ) ዝተሓርደ ገንሸል እዩ።  ምእንቲ ከጽድቐና ውን ካብ ምውታት ዝተንስአ በዂራት እንዳእቲ እዩ። ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን።

ሓንቲ እንዳእቲ 4ይ ክፋል

 ሓንቲ እንዳእቲ 4ይ ክፋል

ዎ እግዚኣብሔር፡ ብሕይወት ምእንቲ ክነብርሲ ከም ቃልካ ደግፈኒ፡ ብተስፋይ’ውን ኣይተሕፍረኒ። ንስኻ በይንኻ መዕቖብየይ ኢኻ፡ ኣብ ግዜ ጸበባይ ከኣ መጸግዕየይ ኢኻ። ኣብ ኲሉ ዘመናት ዝዓቐከብካኒ፡ ከም ብሌን ዓይንኻ ተኸናኺንካ’ውን ካብ ደልሃመት ኃጢኣት ዘናገፍካኒ ንስኻ በይንኻ ኢኻ። ብምሕጻብ ደምካ ሓድሽ ሰብ ጌርካ ሕያው ጌርካኒ ኢኻ’ሞ ኦ ሊቀ ካህነይ፡ ቀርኒ መድኃኒተይ ኢየሱስ ክርስቶስ ስምካ ይባረኽ። ቃላተይ ከም ብርቱዕ ጸሓፊ’ኳ እንተዝኸውን ንምስጋና ዝበቕዕ ቃላት የብለይን ነፍሰይ እናሻዕ ብኣኻ ትሕጐስ ኣላ፡ ስለ ዝተበጀኻያስ ኦ ጐይታ ደስታ ረኺባ ኣላ። ዎ ኣብ፡ እትፈትዎ ሓደ ወድኻ ኢየሱስ ክርስቶስ፡ ቕዱስ ኣበር ዘይተረኽቦ ስርናይ ኮይኑ ምእንታና ክመውት ፈቒድካ ኢኻ፡ “ ንሱ ዘርኡ ክርኢ እዩ ባህ ውን ክብሎ እዩ” ከም ዝበልካ፡ ካብ ደሙ ብእምነት ዳግም ተወሊድና፡ ተኻፈልቲ መለኮታዊ ክብሪ ኮይና ኣሎና እሞ ብስም ኢየሱስ ክርስቶስ ነመስግነካ ኣሎና። ኦ ቅዱስ መንፈስ፡ ኣብቶም ብኢየሱስ ዝኣመኑ እትዓዪ፡ ብመንገዲ ሓቂ ውን እትመርሕ፡ ብመገድኻ ምርሓኒ። ንርእሰ- መኣዝን፡ ቀርኒ መድኃኒት፡ ገንሸል ኣምላኽ፡ ሓንቲ እንዳእቲ ንዝኾነ ወዲ ኣምላኽ ኢየሱስ ክርስቶስ ብዘመነይ ከኽብር ደግፈኒ። ዎ እግዚኣብሔር ጐይታ ሠራዊት ከምቲ ብዘመን ምሕዳስ ኢዮርሳሌም፡ ንመንፈስ ዘሩባብኤል ወዲ ሰኣላቲኤል ምስሌነ ይሁዳን ንመንፈስ ኢያሱ ወዲ ይሆጻድቅ፡ ሊቀ ካህናትን ንመንፈስ ኲሎም እቶም ዝተረፉ ሕዝብን ዘንቃሕካዮ፡ ሎሚ’ውን ንመንፈሰይን  ንመንፈስ እቶም ንስኻ ዝሓረኻዮም ብክርስቶስ ዝኣመኑ ኣገልገልትን ንመንፈስ ኲሉ ሕዝብን ከተንቅሕ ብስም ኢየሱስ ናዝራዊ እልምን ኣሎኹ። ዎ ጐይታ ብጸጋኻ ደግፈና፡ ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን።

እግዚኣብሔር ንሙሴ ከምዚ በሎ፦ “ንደቂ እስራኤል ከምዚ ኢልካ ተዛረቦም፦ ‘ናብታ ኣነ ዝህበኩም ምድሪ ምስ ኣቶኹም፡ ዓጺድ ክትዓጽዱ ከለኹም፡ ካብቲ ቐዳማይ ዓጺድኩም ሓንቲ እንዳእቲ ናብ ካህን ኣምጽኡ። ኣነ እግዚኣብሔር ምእንቲ ክቕበለልኩም ከኣ፡ እቲ ካህን በታ ድኅሪ ሰንበት ዘላ መዓልቲ ነታ እንዳእቲ ኣብ ቅድመይ እናወዝወዘ የቕርባ ዘሌ23፡9-11። 

ብዘይካ እቲ ካብ ሰማይ ዝወረደ ወዲ ሰብ ናብ ሰማይ ዝዓረገ ሓደ’ኳ የልቦን ዮሃ 3፡13

እግዚኣብሔር ኣብ ኲሉ ዘመናት ናይቲ ክግለጽ ዝነበሮ ሓቕታት ኣቐዲሙ ብምሳሌ ነቦታትና ገለጸሎም። እቶም ምሳሌታት ብገዛእ ርእሶም፡ እቲ ቐንዲ ነገር ከም ዘይኮኑ’ውን ኣቦታትና ይርድኡ ነበሩ። ሓዋርያ ቅዱስ ጴጥሮስ ከምዚ ይብል፦ እቶም ብዛዕባ እቲ ንኣኻትኩም ዝተመደበ ጸጋ ዝተነበዩ ነቢያት፡ ብዛዕባዚ ምድኃን እዚ ብዓቢይ ጥንቃቐ መርመሩ። እቲ ኣብኣቶም ኃዲሩ ብዛዕባ ስቓይ ክርስቶስን ብዛዕባ እቲ ዚስዕብ ክብሩን ዚንበ ዝነበረ መንፈስ ክርስቶስ፡ ብዛዕባ ኣየናይ ሰብን ኣየናይ ጊዜን የመልክት ከም ዝነበረ ይምርምሩ ነበሩ። ኣምላኽ ከኣ እቲ ኣገልግሎቶም ንኣኹም እምበር ንገዛእ ርእሶም ከም ዘይኮነ ገለጸሎም(1ጴጥ1፡10-12)።  እምበኣርከስ እቲ ኣቐዲሙ ብመገዲ ነቢየ እግዚኣብሔር ሙሴ ንሕዝቢ እስራኤል ዝተዋህበ ትእዛዝ “ ሓንቲ እንዳእቲ”፡ ንመሲሕ የሽዋ (ኢየሱስ ክርስቶስ) ዝገልጽ ምሳሌ ምዃኑ ኣጸቢቕና ንረዳእ። እዛ ሓንቲ እንዳእቲ መዓስ ከም እትውዝወዝ ኣብ ካልኣይ ክፋል ተመልኪትና ኔርና። “እቲ ካህን በታ ድኅሪ ሰንበት ዘላ መዓልቲ ነታ እንዳእቲ ኣብ ቅድመይ እናወዝወዘ የቕርባ” ዚብል ትእዛዝ ኣምላኽ ንዘክሮ። ወንጌላዊያን ብዛዕባ እዚ ጊዜን ሰዓት ብኣተኲሮ ጽሒፎምልና ይርከቡ።ኣብ 4 ወንጌላት ተጠቂሱ ዘሎ መቓን ጊዜ እዩ። ድኅሪ ሰንበት ለይቲ፡ ናብታ ቐዳመይቲ መዓልቲ ናይ ሰሙን ዘውግሕ(ማቴ28፡1)፡ ሰንበት ምስ ኃለፈት፡… በታ ቐዳማይቲ መዓልቲ ሰሙን(ማር16፡1-2)፡ በታ ቐዳመይቲ መዓልቲ ሰሙን እተን ኣንስቲ ነቲ ዘዳለውኦ ሽቱ ኂዘን፡ ኣንጊሀን ናብ መቓብር ከዳ(ሉቃ23፡1)፡  በታ ቐዳመይቲ መዓልቲ ሰሙን ማርያም መግደላዊት፡ ገና ጸልማት ከሎ፡ ኣንጊሃ ናብቲ መቓብር መጸት(ዮሃ20፡1)። ኤደርሼም፡ ቤተ መቕደስ ኣብ ዝብል መጽሓፎም ከምዚ ዝስዕብ እናበሉ ይትንትንዎ፦ “ እዋን ዓጺድ ናይታ ሓንቲ እንዳእቲ ምስ ኣኸለ፡ ኣመና ብዙኃት፡ ካብ ብዝሖም ዝተላዕለ’ውን  ዝጸቓቐጡ ኣምለኽቲ (ኣይሁዳውያን) ንዓበይቲ እስራኤል ተኸቲሎም ናብቲ በዂራት ዝዕጸደሉ ቦታ ይኸዱ። ሽሕ’ኳ ጸልማት እንተኾነ ይዝምሩ፡ መሳርሒ ሙዚቃታት ይጻወቱ፡ይስዕስዑ፡ ደግነት ኣምላኽ’ውን ይጽምብሉ። እንዳእቲ ድኅሪ ምቚራጹ ኸኣ እቶም ሕዝቢ ንኣምላኽ እናኣመስገኑ መገዶም ናብ ቤተ መቕደስ፡ ናብ መሠውኢ የምርሑ። እዚ ሰዓት እዚ ኸኣ “ Morrow after the Sabbath” ጽባሕ ሰንበት እዩ። እቲ በዂራት (ሓንቲ እንዳእቲ) ኸኣ ኣብ መሠውኢ ምስ ዘይትን ዕጣን ተሓዊሱ ብሓዊ ይሓርር። ዕላማ እዚ ኣገልግሎት፡ ብዘሎ ዓጺድ ንኣምላኽ ምውፋይ እዩ። እታ ሓንቲ እንዳእቲ ወይ በዂራት ከኣ ንብዘሎ ዓጺድ እትውክል እያ። ኣምላኽ ነዛ በዂራት ምቕባሉ ኸኣ ንብዘሎ ዓጺድ ከም ዝተቐበሎ ዝገልጽ ሥርዓት እዩ”።  ስለዚ ክቡር ኣንባቢ/ት ነቲ እዋን ዓጺድ ብዝግባእ ክትዕዘብዎ እደሊ ኣለኹ። ጽባሕ ሰንበት፡ እታ ሓንቲ እንዳእቲ፡ካብ ሰፈር ዓጺድ ተላዒላ ናብ መቕደስ ኣብ ቕድሚ ኣምላኽ ክትቀርብ ከም እትዓርግ(እትድይብ) ነስተውዕል። ዶር. ሪቻርድ ቡከር ኣብ መጽሓፎም ከምዚ ብምባል የብርሁልና፦ጐይታ ኢየሱስ ክርስቶስ ንማርያም መግደላዊት ከምዚ በላ፡ ኢየሱስ ከኣ” ገና ናብ ኣቦይ ስለ ዘይዓረግኩ ኣይትተንክይኒ፡ ግናኸ ናብ ኣኅዋተይ ኪዲ እሞ “ ናብ ኣቦይን ኣቦኹምን ናብ ኣምላኸይን ኣምላኽኩምን እዓርግ ኣሎኹ በልዮም በላ (ዮሃ 20፡17)። ጐይታ ኢየሱስ ክርስቶስ፡ ኣብቲ ሓንቲ እንዳእቲ ተቖሪጻ ኣብ ቕድሚ ኣምላኽ እትውዝወዘሉ እዋን እዩ ተንሲኡ፡ ከምቲ እታ እንዳእቲ ተቆሪጻ ኣብ ቕድሚ ኣምላኽ ክሳዕ እትውዝወዝ ዓጺድ ዘይትንከ፡ ኢየሱስ ክርስቶስ ከኣ ገዛእ ርእሱ ናብ ሰማያዊ መቕደስ ፡ከም ቅዱስ በዂራት ኣብ ቅድሚ ኣምላኽ(ኣቦ) ቅድሚ  ምቕራቡ ክትንከፍ ስለ ዘይብሉ ናብ ኣቦ ስለ ዘይዓረግኩ ኣይትተንክፍኒ በላ። ኢየሱስ ክርስቶስ ካብ ምዉታት በዂሪ ኮይኑ ተንስአ። ንሱ ዓቢይ ሊቀ ካህናትና እዩ፡ ገዛእ ርእሱ ኣብ ቅድሚ ኣቦ፡ ኣብቲ ልክዕ ዓጺድ “ሓንቲ እንዳእቲ” ተዓጺዳ እትውፈለሉጊዜ  ጽባሕ ሰንበት፡ ዘቕረበ በዂራት እዩ።  

ሓንቲ እንዳእቲ፡ ክሳዕ ክንድዚ ምሥጢር ህላወና፡ ተስፋና ዝሓዘት መለኮታዊት መልእኽቲ እያ። ከምቲ ኣምላኽ ንኢየሱስ ዘተንስኦ፡ ነቶም ብኢየሱስ ኣሚኖም ዘዕረፉ’ውን ከተንስኦም እዩ። ምውታት ዘይትንስኡ እንተኾይኖም ክርስቶስ’ውን ኣይተንስአን። ንሕና ግና ጐይታ ኢየሱስ ክርስቶስ ከም ዝተንስአ፡ ንሱ በይኑ ካብ ምዉታት ከም ዝተንስአን ብዘይካኡ’ውን ሓደ’ኳ ካብ ምዉታት ከም ዘይተንስአ ኢና እንኣምን። ቅድም በዂራት፡ ደኃር ከኣ እቲ ዝተረፈ ዓጺድ እዩ ዝዕጸድ፡ መጽሓፍ ከምዚ ይብል ከምቲ ኲላቶም ብኣዳም ዝሞቱ፡ ከምኡ ኲላቶም ብክርስቶስ ሕያዋን ክኾኑ እዮም። ግናኸ በብመስርዑ እዩ፦ ቅድም ክርስቶስ፡ ደኃር ኣብ ካልኣይ ምጽኣቱ፡ እቶም ናይ ክርስቶስ ዘበሉ(1ቆሮ15፡22-23)። እዋን ዓጺድ ምስ ኣኸለ ሓንቲ እንዳእቲ(በዂራት) ከይተዓጽደት እኽሊ ኣይትንከፍን እዩ። በዂራት ድኅሪ ምውዝዋዛ ኸኣ ብዘሎ ዓጺድ ይዕጸድ። ሕጂ ክርስቶስ በይኑ ከም በዂራት ተንሲኡ እዩ፡ ብዘይክኡ ዝተንስአ ሓደ’ኳ የልቦን። ደኃር ኣብ ካልኣይ ምጽኣቱ እቶም ብክርስቶስ ዝኣመንና፡ ኣምላኽ ከተንስኣና እዩ። እታ መለኸት ክትንፋሕ እያ፡ እቶም ዝሞቱ ኸኣ ብዘይበርሥ ክትንስኡ እዮም፡ እቶም ብሕይወት ዝጸንሑ ኸኣ ከም ቅጽበት ዓይኒ ክልወጡ እዮም ። ኦ ጐይታ ስለ ዂሉ ነገር ተባረኽ። እቶም ኣብቲ ናይ ሕይወት ትንሳኤ ግደ ዘለዎም  ‘ቶም ክዳውንቶም ብደም ገንሸል ዘጻዕደዉ ጥራይ እዮም።  ንእግዚኣብሔር ኣቦ ስለ ኹሉ ነገር ብስም ኢየሱስ ክርስቶስ ስብሐት ይኹን! ኣሜን።