ብመንፈስ ቅዱስ ክትጥመቑ ኢኹም! ግብ 1፡5

ብመንፈስ ቅዱስ ክትጥመቑ ኢኹም! ግብ 1፡5

ኦ እግዚኣብሔር ጐይታ ሠራዊት ስለ እቲ ዘደንቕ ግብርኻ አመስግነካ ኣሎኹ። ንብዙሕ ዘመናት ዘተስፈኻና ውህበት ስለ ዝገለጽካዮ ስምካ ይባረኽ። ነቶም ኩሎም ብኢየሱስ ክርስቶስ ብምእማን ብደሙ ዝጸደቑ፡ ህያብ መንፈስ ቅዱስ ስለ ዝዓደልካዮም ስምካ ይባረኽ። ብጥበብካ ንጥበብ ዓለም ኣጥፋእካ፡ እዚ ኸኣ ሳላ ደም ኢየሱስ ክርስቶስ ኰይኑልና ኣሎ። ኦ ቅዱስ ኣቦ ስለ እቲ ኹሉ ዘደንቕ ግብርታትካ ብስም ኢየሱስ ክርስቶስ አመስግነካ ኣሎኹ። ኦ ሊቀ ካህናት ኢየሱስ ክርስቶስ ነቲ ተስፋ ኣቦ ስለ ዝለኣኽካልና ስብሐት ይኹንካ። እቶም ብደምካ ዝጸረዩ፡ ብሓቂ ንሶም ከኣ እዮም ብመንፈስ ቅዱስ ተመሊኦም (ተጠሚቖም) ስምካ ንምምስካር ብርቱዓት ዝዀኑ፡ እዚ ሥልጣን እዚ ናትካ ናይ በይንኻ’ዩ፡ ብዘይካኻስ ንተስፋ ኣቦ ክሰደልኩም እየ ዝበለ ሓደ’ኳ የልቦን። ኦ ጐይታ ነቶም ብስምካ ብምእማን ሥርየት ኃጢኣት ዝረኸቡ፡ ብመንፈስ ቅዱስ እትመልእ ንስኻ ኢኻ፡ ሎሚ ውን ነዚ ዕዮ ትዓዮ ኣሎኻ። ስለዚ ኸኣ ምእንትዚ ዓቢይ ግብሪ አመስግነካ ኣሎኹ። መንፈስ ቅዱስ፡ ቕዱስን ሕያውን መንፈስ፡ ዕርቡን ርስቲ ኣመንቲ፡ ነታ መርዓት ዝዀነት ቤተክርስቲያን ናብ ምልኣት ክርስቶስ እተዕቢ ንስኻ ኢኻ፡ ኦ ጐይታ ምሳና ስለ ዘሎኻ ሰላም ኮይንልና ኣሎ፡ ብኹሉ ዘመናትና ክንእዘዘካስ ነቲ ሕይወት ዝዀነ፡ ምኽርኻ፡ቃላትካ፡ተግሳጽካ፡ ብርትዐኻ ኣብ ሕይወትና ኣንብር። ኦ መንፈስ ቅዱስ ንስኻ መሕወይን መጸናንዕን ኢኻ’ሞ ንልብና በቲ ብርቱዕ ኃይልኻ ምላእ፡ ወርትግ ክንእዘዘካ ንቓላትካ ኣብ ልብና ዕቖሮ። ንስኻ ንዘለዓለም ንዂቚጸር ዘይክእል ዘመናት ብምሳና እትነብር ኣቦና ኢኻ፡ ክብርን ምስጋናን ስግደትን ውዳሴን ንዓኻ ይኹን። ንእግዚኣብሔር ኣቦ ብስም ኢየሱስ ክርስቶስ ስብሐት ይኹን።

ሻቮት (Shavuot) ሓምሳ መዓልቲ

ካብታ ዚውዝወዝ እንዳእቲ ዘምጻእኩምላ መዓልቲ፡ ካብ ጽባሕ እታ ሰንበት ቆጺርኩም ሾብዓተ ምሉኣት ሰናብቲ ይኹና። ክሳዕ ጽባሕ እታ ሳብዐይቲ ሰንበት ሓምሳ መዓልቲ ቚጸሩ፡ ሽዑ ንእግዚኣብሔር ሓድሽ መሥዋዕቲ ብልዒ ኣቕርቡ (ዘሌ2315-16) ።

እግዚኣብሔር ጐይታ ሠራዊት ንግብርታቱ ስለ ዝገለጸልና ክብሪ ይኹኖ። ነዚ ክዉን ሓቂ ምእንቲ ኽንርዳእ መንፈስ ቅዱስ ኣብርሆት ምስትውዓል ይሃበና። ብሕቶ እንተጀመርኩስ ግር ዶ ይብለኩም ይኸውን? “ጴንጠቆስጠ” እንታይ ማለት’ዩ? በሉ ንቐጽል፡ ንዝተወሰነ እዋን ጊዜ ሂብኩም መርምርዋ፡ ዘለናዮ ዘመን፡ ዘመነ ቴክኖሎጂ’ዩ እሞ Pentecost ዚብል ቃል ኣብ Google ኣእቲና ምስሉን ድምጹን ነስተማቕሮ። “ ብዘበን ውቤ ዝጸመመስ ውቤ ክብል ነበረ” ዚብል ምስላ ዓድና ከይፈርደና ንንቓሕ። ምስ ምትርጓም መጻሕፍቲ ብሉይ ኪዳን’ዩ ጴንጠቆስጤ ዚብል ቃል ኣብ ትርጉም መጽሓፍቲ ብሉይ ኪዳን ሰፊሩ ፡ እዚ ኸኣ መጻሕፍቲ ብሉይ ኪዳን ካብ ዕብራይስጥ ናብ ግሪኽ ኣብ ዝተተርጎምሉ ጊዜ እዩ። ዕብራውያን ነዚ ኣብ መበል ሓምሳ መዓልቲ ዝበዓል በዓል ሻቮት ኢሎም ይሰምይዎ፡ጴንጠቆስጠ እምበኣር መበል ሓምሳ መዓልቲ ማለት እዩ። “እታ ሓንቲ እንዳእቲ” (www.genshel.com) ኣብ ዚብል ጽሑፍ ሰፊሩ ከም ዘሎ፡ እታ እንዳእቲ ጽባሕ ሰንበት ብዕልልታን ደስታን ተዓጺዳ ንበይና ተፈልያ፡ ከም በዂራት ኣብ መቕደስ ካብ እተወዝወዘትሉ ቀዳማይ መዓልቲ ኦመር (1^st day of Omer) ክሳዕ እዛ ዓቢይ ደስታ ዝግበረላ ንእግዚኣብሔር ሓድሽ መሥዋዕቲ ብልዒ ዝቐርበላ መዓልቲ 50 መዓልታት(50^th day of Omer) እዩ። ኣምላኽ ዝሰርዖ ትእዛዝ መስተንክርን ዘደንቕን እዩ። ሕዝቢ እስራኤል ነዚ ተስፋ ተሰኪሞም ንልዕሊ 1500 ዓመታት በዓል ሻቮት ኣብዒሎም እዮም; ይኹን ደኣ እmበር ንሱስ ጽላሎት ናይቲ ኽግለጽ ዘለዎ ሓቂ እዩ። ኣይሁዳውያን ምሁራት ዝብልዎ ሓሳብ ከቕርበልኩም፡ “ሙሴ ሕጊ ኣብ ደብረ ሲና ዝተቐበለ ኣብ መዓልቲ ሻቮት(ጴንጠቆስጠ) እዩ” ይብሉ። ኣምላኽ ብኸመይ ዓይነት ዘደንቕን ዘፍርህን መገዲ ኣብ ደብረሲና ከም ዝተገልጸ ዘጸ19፡16-20 ገንጺልኩም ንበብዎ’ሞ ምስቲ ኣብ ግብሪ ሓዋርያት ምዕራፍ 2 ተጻሒፉ ዘሎ ኣነጻጽርዎ ። እታ ብፊደል ዝተጻሕፈት ሞት እተስዕብ ኣገልግሎት ብኽብሪ ካብ ተገልጸትሲ፡ እታ ኣገልግሎት መንፈስ ቅዱስ ደኣ ከመይ ኣዝያ ብኽብሪ ዘይትግለጽ? እታ ኲነኔ እተስዕብ ኣገልግሎት ካብ ከበረት፡ እታ ጽድቂ እተስዕብ ኣገልግሎት ደኣ ከመይ ኣዝያ ዘይትኸብር? ኣምላኽ ከም ፍቓዱን መደቡን ነቶም ብኢየሱስ ክርስቶስ ዝኣመኑ ብመንፈስ ቅዱስ መልኦም፡ እዚ ኣብ ኢዮርሳሌም ዝዀነ ግሁድ ፍጻሜ እዩ። “ንመንፈሰይ ኣብ ሰብኡትን ኣንስትን ከፍስስ እየ” ዚበለ ኣምላኽ ሕያው እዩ፡ ብርግጽ ሎሚ ውን ሕያው እዩ ። እምበኣር ልብታትና ካብ ምቚጻር መዓልታት ሓሊፉ ብዛዕባ እቲ ዘመናት ክግድብዎ ዘይክእሉ መንፈስ ቕዱስ ክሓስብን ክብህግን ይግብኦ። መንፈስ ቅዱስ ማኅደሩ ዝገብሮም ነቶም ብደም ጐይታ ኢየሱስ ክርስቶስ ብምእማን ዝደሓኑ፡ ብደሙ ዝተሓጽቡ ጥራይ እዩ። ዓለም ንመንፈስ ቅዱስ ኣይትፈልጦን እያ፡ ክትርድኦ ውን ኣይትኽእልን እያ፡ ንሱ ንዓና ፈለጠና’ሞ ሕያዋን ከኣ ገበረና። ኦ መንፈስ ቅዱስ ስምካ ይባረኽ! ሃሌ ሉያ። ልብታትና ነዚ ቕዱስ መንፈስ ከፊትና ንጸውዓዮ ነቶም ናይ ኢየሱስ ክርስቶስ ዝዀኑ ዝወሃብ ህያው እዩ። ኢየሱስ ከምዚ በለ፡ እቲ ብኣይ ዚኣምን፡ ከምቲ ጽሑፍ ዝበሎ፡”ካብ ውሽጡ ርባታት ማይ ሕይወት ኪውኅዝ እዩ” እናበለ ተዛረበ። እዚ ብዛዕባቲ እቶም ብእኡ ዝኣመኑ ኺቕበልዎ ዘለዎም መንፈስ ቅዱስ እዩ ዝተዛረበ፡ ዮሃ7፡38-39 ።

ስም ኣሮን ኣብ ልዕሊ በትሪ ሌዊ ጸሓፍ (1ይ ክፋል)

ስም ኣሮን ኣብ ልዕሊ በትሪ ሌዊ ጸሓፍ ዘኁ17፡4

1ይ ክፋል

ኦ እግዚኣብሔር ጐይታ ሠራዊት ብዘሎ ሥልጣንን ሽመትን ካባኻ እዩ እሞ አመስግነካ ኣሎኹ። ንስኻ ከም መጠን ቅዱስ መደብካ ሥርዓት ሰራዕካልና፡ ዘወትር ምእንቲ ክንክተሎ መንፈስካ ይርድኣና። ንዓለም ከኣ በቲ ንስኻ ዝሸምካዮ ሊቀ ካህናት ኢየሱስ ከተድኅኖ መደብካ፡ ምእንት’ዚ ውን ንሕና ነመስግነካ ኣሎና። ኦ ኣምላኽ መጠን ጥበብካን ጸጋኻን ምእንቲ ክንርዳእ መንፈስካ ሃበና። ነቲ ዝሾምካዮ እሙን ካብ ኃጥኣን ዝተፈልየ ሊቀ ካህናት ከነኽብርን፡ ክንውድስን፡ ክንቅበልን ሓግዘና። ብሓቂ ንዓና ኸኣ ድኻም ዘይብሉ፡ ካብ ሰማያት ልዕል ዝበለ ሊቀ ካህናት እዩ ዘድልየና። መጠን ሰፊሕን ብሩህን ቃላትካ ክንርዳእ ሓግዘና፡ ስለ ኹሉ ነገር ከኣ ብስም ጐይታ ኢየሱስ ክርስቶስ አመስግነካ ኣሎኹ። ጐይታ ኢየሱስ ክርስቶስ ሊቀ ካህንና ንምዃን ሰብ ዝዀንካ ሊቀ ካህናት ኢኻ’ሞ አመስግነካ ኣሎኹ። ኣብ ዘመነይ ንኽህነትካ ክቕበልን ክኣምንን ስለ ዝረዳእካኒ አመስግነካ ኣሎኹ፣ ንነፍሰይ ኩሉ ሳዕ እትቖመላ ሊቀ ካህናት በይንኻ ኢኻ፡ ኦ ጐይታ ስምካ ይባረኽ። ንስኻ ካብ ሰማያት ልዕል ዝበልካ፡ ብደምካ ወለዶታት ዓዲግካ ናብ ኣቦ እተቕርብ እሙንን ደንጋጽን ሊቀ ካህናት ኢኻ፡ በዚ ነገራት’ዚ እተኣማመን እምካሕ’ውን ኣሎኹ። ስምካ ንዘለዓለም ዓለም ይባረኽ! ሃሌ ሉያ። መንፈስ ቅዱስ ንድኻምና እትድግፎ ምስትውዓል ውን እትህበና በይንኻ ኢኻ፡ ሕይወትና ብሓርነት ምእንቲ ክትመላለስ ንምልኣት ቃልካ ኣብ ልብና ግለጽ። ነቲ ካብ ጥንቲ ዘመሓላለፍካዮ ሕያው ቃል ብምእማን ዳግም ክንህነጽ፡ ኦ ጐይታ ንመዓልታትና አሐድሶ። ብኃይሊ መንፈስካ ክንመላለስን ብደም ጐይታ ኢየሱስ ክርስቶስ ብምእማን ብሊቀ ካህንነቱ፡ ማእከላውነቱ፡ ኣታዓራቕነቱ፡ መንጎኛነቱ ወርትግ ክንድገፍን ነቲ ዋና ነገር ከነጒልሕን ብርሃን ኣብርሃልና። ነቲ ብሰብ ዝተናዕቐ ብኣምላኽ ዝተሓርየ እሙን ሊቀ ካህናት ኢየሱስ ክርስቶስ ክንግዛእ፡ ኣብ ልዕሊ ዘለዓለማዊ ክህነቱ’ውን ከይንዕምጽ ጐይታ ሓልወና። ንእግዚኣብሔር ኣቦ ብስም ጐይታ ኢየሱስ ክርስቶስ ስብሐት ይኹን ኣሜን።

እግዚኣብሔር ድማ ንሙሴ፡ ንደቂ ዓመጻ፡ ምእንቲ ከይሞቱ፡ ነቲ ናባይ ምጒርምራምም መወዳእታ ኽትገብር፡ ትእምርቲ ክትኮኖም፡ ንበትሪ ኣሮን፡ ኣብኡ ክትሕሎ ናብ ቅድሚ ምስክር ምለሳ በሎ። ዘኁ17፡10

እግዚኣብሔር ጐይታ ሠራዊት ብዓቢይ ትእምርትን መቕጻዕትን ፍርዱ ዘርኣየሉ ፍጻሜ እዩ። ብመሠረት’ዚ ጽሑፍ ኣምላኽ ኣብ ክህነት ኣሮን ተቓውሞ ብምርኣይ ኣብ እግዚኣብሔር ንዝዓመጹ መራሕቲ ኣኼባ እስራኤል ዘርኣዮ ቅኑዕን ግሉጽን ፍርድን ትእምርትን ክንርኢ ኢና። ዕላማ እዚ ጽሑፍ ኣምላኽ ኣብቲ ንሱ ዝሰርዖ ሥርዓት ክህነት ኣሮን፡ ብናይ ገዛእ ርእሶም ክቱር ድሌት ተላዒሎም ንዝዓመጹ ሰባት ዝሃቦ ፍርዲ ምግንዛብ፡ ከምኡ’ውን ኣምላኽ ኣብ ዝሰርዖን ሊቀ ካህናት ገይሩ ዝሸሞ ወዱ ኢየሱስ ክርስቶስን ዝለዓል ተጻብኦን ዓመጽን ከቢድ ፍርዲ ዘስዕብ ግብሪ ኣብ ርእሲ ምዃኑ፡ ናይ ዘለዓለም ፍርድን ቁጥዓን ዘምጽእ ምዃኑ ውን ምዝኽኻር’ዩ።

ሀ. ኣብ ልዕሊ ሙሴ ዝተላዕለ ዓመጽ

እግዚኣብሔር ጐይታ ሠራዊት ንሕዝቢ እስራኤል ካብ ግብጺ ብመርሒነት ሙሴ ምስ ኣውጽኦም፡ ነቲ ሕዝቢ ንኽመርሑ ውን መዝነት ዝሃቦም ሙሴን ኣሮንን እዮም። ኣብ ዘኁ ምዕራፍ 16 ተጻሒፉ ከም ዘሎ፡ ቆሬ ወዲ ይጽሃር ወዲ ቃሃት፡ካብ ነገድ ሌዊ፥ ዳታንን ኣቤሮንን ደቂ ኤልያብ፡ ኦን ከኣ ወዲ ጴሌት ካብ ነገድ ሮቤልን፡ ምስኣቶም ድማ ኣስታት 250 ዝኣኽሉ ስሙያት መራሕቲ እስራኤል ኣብ ልዕሊ ሙሴ ብዓመጽ ተላዕሉ። እዞም ሰባት እዚኦም ኣብ ልዕሊ ሙሴን ኣሮንን ጽልእን ውልቃዊ ህርፋናቶም ንምርዋይ ብዓመጽ ዝተላዕሉ ሰብ ክኽተሎም ዝኽእል ስሙያት ሽማግለታት እዮም። ብዙሕ ሳዕ ኣብ ሕዝብና ምስ መቕጻዕትን ፍርድን ኣብ ዝለዓሉ ዛዕባታት ታሪኾም ብዝተፈራረቐ መንገዲ ተነጊሩ እዩ፡ ይኹን ደኣ እምበር ነቲ መቕጻዕቲ ዘስዓበ ኣብ ልዕሊ እግዚኣብሔር ዝተኻየደ ዓመጽ ዝጐሰየ፡ጭቡጥን ግሉጽን መብርሂ ዘይተኸተለ ኣዘናትዋ እዩ። ኣብዚ ክፍሊ ጽሑፍ ብዕምቆት ነቲ ዝተኸስተ ፍጻሜ ክንምልከቶ’ውን እምሕጸን። ካብዞም ኣስማቶም ተጠቒሱ ዘሎ 4 ሰባት፡ ኣብ ናይ ሌዋውያን ግደን መሰልን ዝነበሮ ቆሬ ጥራይ’ዩ፡ ንሱ ብዘርኡ ካብ ነገድ ሌዊ ኰይኑ ናይ ሌዋውያን ተግባር ደኣ እምበር ናይ ክህነት ኣገልግሎት ክፍጽም ዘይተፈቕደሉ ወዲ ቀሃት እዩ። እቲ ኣብ ልቡ ተላዒሉ ዝነበረ ሓሳብ ከኣ ኣብቲ ንኣሮንን ደቁን ዝተዋህበ ናይ ክህነት ኣገልግሎት ተሳታፊ ንኽኸውን፡ ግደን መሰልን ሌዋውያን ከም ዘየዕገቦ’ሞ፡ ብናይ ገዛእ ርእሱ ፍቓድን ትምኒትን ክህነት ብምድላይ ኣብ ልዕሊ ሙሴን ኣሮንን ብዓመጽ ተላዕለ። ካብቶም ተቒሶም ዘለዉ ካልኦት ነገዳት እስራኤል ኣብ መቕደስ ኣምላኽ፡ ንኣምላኽ ከገልግል ዝተሾመ እኳ እንተዘይሃለወ፡ ሥልጣንን ሽመትን ክህነት ብምብሃግ ንኣሮን ብምቅዋም ኣብ ኣምላኽ ከም ዝበደሉ ንዕዘብ ኣሎና። እዚኣቶም ኩሎም ኣኼባ ብምምካር ኣብ ልዕሊ ሙሴን ኣሮን ክሲ ዘልዓሉ መራሕቲ እዮም። “ እምብዛ ኣብዚኅኩሞ” ብዝመሰረቱ ካብ ውልቃዊ ባህጊ ሥልጣን ዝመንጨወ ክሲ ፈጢሮም፡ ኣብ ልዕሊ መርሒነት ሙሴን ኣሮንን ተቓውሞ ዘስምዑ፡ ንኣምላኽ ካብ ቅድሚኦም ዘርሓቑ መራሕቲ እዮም።

  

ቤዛ 9 ክፋል

ቤዛ 9 ክፋል

ንሱ ኸኣ ኻባታቶም ዳርባ እምኒ ዚኣክል ርሒቑ፡ ተምበርኪኹ፡ ኣቦይ ፍቓድካ እንተዀይኑስ ነዛ ጽዋዕ እዚኣ ካባይ ኣሕልፋ ግናኸ ፍቓድካ እምበር ፍቓደይሲ ኣይኹን እናበለ ጸለየ። ዜበርትዖ መልኣኽ ካብ ሰማይ ተራእዮ። ጻዕሪ ሞት ሒዝዎ ኣጽኒዑ ይልምን ነበረ። ረሃጹ ኸኣ ከም ነጥቢ ደም ናብ ምድሪ ይነጥብ ነበረ። (ጥንታዊ ትርጉም መጽሓፍ ቅዱስ ትግርኛ ሉቃ 22፡41-44) ።

ኦ ንዘለዓለም ሕያው ዝዀንካ ኣምላኽ ስምካ ይባረኽ። ንስኻ ንወለዶታት እትባርኽ ከም ቓልካን ፍቓድካን ውን ምእንቲ ኽነብሩ እትእዝዝን እትመርሕን ኣቦ ኢኻ። ኦ ኣቦ ብርሃናት፡ “ ድኅሪ ስቓዩ ከም ብሓድሽ ሓጐስ ክረክብ እዩ፡ንኸንቱ ከም ዘይተሳቐየ ኸኣ ክፈልጥ’ዩ” ኢሳ 53፡11 ከም ዝበልካ፡ ብሓቂ ብጸሎትን ልመናን ሓደ ወድኻ ስለ ዝተቐበልካና አመስግነካ ኣሎኹ። ንሱ ካብ ሰማይ ምእንት’ዚ ዕዮ ዝለኣኽካዮ ሓዋርያ፡ ሊቀ ኻህንና ብምዃን ኣብ ክንዳና መሪር ንብዓትን ጸሎትን ልመናን ብምቕራብ፡ ብደሙ ዝዓደገና ቕቡእ ወድኻ ኢየሱስ ክርስቶስ እዩ። ነዛ ጽዋእ እዚኣ ክቕበላ ዝኽእል ብዘይካኡ’ኸ መን ኣሎ? ሓደ’ኳ ብቑዕ ኰይኑ ዝተረኽበ የልቦን። ኦ ጐይታ ኣእምሮና ነዚ ዘደንቕ ዕዮ ክርዳእ ብርሃን ኣብርሃሉ፡ መንፈስ ቅዱስ ነዚ ዘለዓለማዊ ኪዳን ደም፡ ምእንቲ ኽንርዳእ ምስትውዓል ሃበና። ነቲ ብደሙ ዘፍቀረና፡ ምእንቲ ሓጢኣትና’ውን ተምበርኪኹ ብዓቢይ ጭንቐትን ገዓርን ናብ ኣቦ ዝጸለየ፡ ጸሎቱ ውን ዝተሰምዐ ጐይታ ኢየሱስ ክርስቶስ ስብሓት ይኹን። ንእግዚኣብሔር ኣቦ ብስም ጐይታ ኢየሱስ ክርቶስ ስብሐት ይኹን።

ጸሎተ ሐሙስ

እግዚኣብሔር ጐይታ ሠራዊት ነቲ ዘደንቕ ምድኃን ሰባት ፈጺምዎ እዩ። ኣቐዲሙ ንኣቦታትና ዝተነግረ ተስፋ ኸኣ ነገረ-ቤዛነት ኢየሱስ ክርስቶስ እዩ። እዚ ወንጌል’ዚ እቲ ኣቐዲሙ ንኣብርሃም ዝተሰብከ፡ ኣብርሃም ውን ዝተቐበሎን ዝኣመኖን፡ ናይ ጸጋ ወንጌል እዩ። ሎሚ ውን ንኩሉ ፍጥረት ዝስበኽ ዘይባተኽ ወንጌል እዩ። ኩሉ ሰብ ሕጊ ብምፍጻም ክጸድቕ ስለ ዘይክእል፡ ኣምላኽ ሰባት በቲ ኻልእ መገዲ ማለት ብኢየሱስ ክርስቶስ ብምእማን ጥራይ ከም ዝድሕኑ፡ ብሞት ወዱ ኣዊጁ ኣሎ፡ እዚ ኸኣ ናይ ጸጋ ወንጌል እዩ።

ኣእምሮናን ልብናን ናብ ጌተሰማኒ መሊስና ብዛዕባ እቲ ዓቢይ ዕዮ ኣምላኽና ብመንጽር ቃሉ ክንምርምርን ክንኣምንን ፍቓድ ኣምላኽ’ዩ። ቃል ኣምላኽ ኣይእሰርን እዩ፡ እቲ ኢየሩሳሌም ክትቕበሎ ዝጸገማ ቃል፡ ኣብ ሰማርያ ብዙኃት ንጐይታ ክቕበሉን ብደሙ ክዕደጉን ረዲእዎም እዩ። ንቃል እግዚኣብሔር ክኽልክሎ ዀነ ካብ ምብጻሕ ከብክሮ ዝኽእል የልቦን። ምኽንያቱ ቃሉ ብዕዮን መርሒነትን መንፈስ ቕዱስ ዝዝርጋሕ ኃይሊ ኣምላኽና ዝገሃደሉ ጥበብ እዩ። “ ጸሎተ ሐሙስ” ዝብል ስያሜ ንመፍለይን መፍለጥን እታ ጐይታ ኣብ ኢድ ዓመጽቲ ዝኣተወላ ሰዓት ዝገልጽ’ዩ። እቲ ስም ከም ዝሕብረና’ውን ኣብቲ ዕለት ዝተፈጸመ ዓቢይ ፍጻሜ፡ ጸሎት ጐይታና ኢየሱስ ክርስቶስ ምዃኑ ይነግረና። ነዚ ሓቂ’ዚ ብዘይ ምሽፋንን ምብራዝን ዘቐመጡልና ኣቦታትና ሓዋርያት እዮም። ወንጌላዊ ሉቓስ ብዘገርም ጥበብ፡ ብዕምቖትን ብምስትንታን፡ ካብታ ካብ ደቂ መዛሙርቱ ዚተፈለየላ ሰዓት ክሳዕ ዝምለሶም ንዘለዋ ፍጻሜታት ብደቒቕ‘ዩ መዝጊብዎ። ክሳዕ ክንዲ ምንታይ ብዕምቖት ከም ዝተመልከቶ ጽሑፋቱ ይነግሩናን የብርሁልናን እዮም። እቲ ኣዝዩ ዝገርም ዕሽነት እዚ ዘመን ከኣ ክንርእዮን ክንምልከቶን ክሳዕ ዘይንደሊ ኣብዚ ፍጻሜ ክህልወና ዝግብኦ ተገዳስነት ባይታ ዘቢጡ ምርካቡ’ዩ። እቲ ብደም ኢየሱስ ክርስቶስ ዝርከብ ሕይወት፡ ነቲ ንሱ ዘቕረቦ ገዓርን ንብዓትን ጸሎትን ልመናን ምኽሓድ ወይ ውን ግዲ ብዘይምግባር ኣይርከብን እዩ። ኢየሱስ ኣብዛ ምድሪ እዚኣ ኸሎ ናብቲ ካብ ሞት ከድኅኖ ዝኽእል፡ ብብርቱዕ ገዓር ጸሎትን ልመናን ኣቕረበ ዚብል ናይ መንፈስ ቅዱስ ቓል ሎሚ ውን ሕያው’ዩ። እዚ እምነት’ዚ ንሰብ ካብ ድቕድቕ ጸልማት ኣውጺኡ ሕይወት ዝዕድሎ እዩ፡ ምእንትዚ ዕዮ ኢየሱስ ክርስቶስ ካብ ሰማይ ብምውራድ ሰብ ኰይኑ እዩ። ንሱ ንሰባት ናብ ኣቦ ዘቕርብ እሙንን ደንጋጽን ሊቀ ካህናት እዩ። ሎሚ ውን ሕይወት ንዝብህጉ ብዝርጉሕ ቅልጽም ዝጽበ፡ ምስ ኣቦ ዚዓርቕ፡ ማእከላይ፡ መንጐኛ፡ ሊቀ ካህናት እዩ። እቲ ንሱ ዘቕረቦ ጸሎትን ልመናን ገዓርን ክቡር ደምን ሕያው’ዩ፡ ነቶም ብኢየሱስ ኣቢሎም ናብ ኣቦ ዚመጹ ኹሎም ከኣ ክዓርቕ ከድኅን ዝኽእል፡ ኣብ የማን ልዑል እተቐመጠ ሊቀ ካህናት እዩ። 

ኦ ጐይታ መንፈስ ቅዱስ ነቲ ሕያው ዝኾነ ቓልካ ብእምነት ምእንቲ ኽንቕበሎን ብእኡ ውን ድኅነት ክኾነልናስ፡ ንብዘሎ ማእሰር ጸልማት ብስም ጐይታ ኢየሱስ ክርስቶስ ብተኽ። ንሕዝብኻ ብምስትውዓትን ጥበብን ምላእ።