ኢየሱስ መንጐኛ ሓድሽ ኪዳን ዝኾነሉ
ምኽንያት እንታይ እዩ?
ኦ ንዘለዓለም ሕያው ዝዀንካ ጐይታ ስምካ ይባረኽ፡ ብኹሉ
እዋንን ዘመንን ዝረዳእካና ንስኻ ኢኻ እሞ አመስግነካ ኣሎኹ። እቲ ዝበለጸ ዝኃሸን ኪዳን ዝመሥረትካልና ንስኻ ኢኻ፡ ዎ ጐይታ ወርትግ
ነፍሳትና ከመስግናኻ ጸጋኻ ኣይፈለየና። እቲ ዘበርትዕ መንፈስካ የበርትዓና፡ ንልብና ንሱ ይርትዓዮ፡ ካብቲ ካብኡ ዝርከብ ኃይሊ
ምእንቲ ክንብርትዕ ኦ ጐይታ ንመንፈስካ ኣባና ኣፍስሶ። እቲ እኳ ምእንቲ ኹላትና ንወዱ ዘይራህርሃሉ ኣቦ፡ መጠን እቲ ረዚን ፍቕሩ
ብደም ወዱ ከድኅነና ብምፍታዉ ስብሐት ይኹኖ። ንሱ ብዙኃት ዉሉድ ክህልውዎ ብምብሃጉ፡ ነቲ ርእሲ ኹሉ ዝዀነ ወዱ ብመከራ ክኃልፍ
ፈቐደ፡ እዚ ተግባር ድኅነት እዚ ከቶ ውን ብኻልእ ክዕየ ዘይክእል ኣምላኻዊ ፍቓድ እዩ። ምእንት`ዚ ኸኣ ንእግዚኣብሔር ኣቦ ብስም
ጐይታ ኢየሱስ ነመስግኖ ኣሎና።
ዘወትር ኣብ ልበይ ዝመላለስ ብዛዕብኡ ኸኣ ሓሲበን ሓሊነን
ክፍጽሞ ዘይከኣልኩ ኣርእስቲ እንተ ኣሎ ነገረ- ደም እዩ። ቅዱሳት መጻሕፍቲ ኣብ ጸጽባሕ ምግላጽ ዝህቡ ዘይነጽፉ ዓይኒ ማያት ምዃኖም
ግርም እዩ ዝብለኒ ንኣምላኸይ ከኣ አመስግኖ። ዘለዓለማዊ ዕላማ ኣምላኽ ድኅነት ሰብ እዩ፡ ንሱ ኸኣ እቲ ብበጃነት ዝተኸናወነ ኣጀንዳ
እዩ። ድኅነትን ደምን ክልተ ገጻት ናይ ሓንቲ ሳንቲም እዮም፡ መጽሓፍ ከኣ ከምዚ ይብል ብዘይ ምፍሳስ ደም ሥርየት ኃጢኣት የለን።
ጽኑዕ ዝኾነ ኣምላኻዊ ትእዛዝ ከኣ እዩ። ሎሚ ኣብ ኣጋ ምሸት ብዛዕባ’ዚ ደም እናሓሰብኩ ከለኹ፡ ኣእዳወይ መጽሓፍ ቅዱስ ገንጺለን
ደም ዚብል ቃል ኣብ መጽሓፍ ዕብራውያን ክንደይ ሳዕ ኮን ተደጋጊሙ ተጻሒፉ ብምባል ምቛጻር ጀመራ፡ ዘገርምን ዘደንቕን ጥበብ እቲ
ጸሓፊ ኸኣ እዚ እዩ፡ ከረድኦ ዝደለየ ዓቢይ ዛዕባ መልእኽቲ ዕብራውያን፡ ናይ ኢየሱስ ክርስቶስ ሊቀ-ካህንነት(መንጐኛኘት፡ ኣተዓራቕነት)
ብምዃኑ ደም ንዚብል ቃል ደጋጊሙ እዩ ተጠቒምሉ። ኣብ ዓሠርተው ሠለስተ ምዕራፋት፡ ዕስራን ክልተን ሳዕ ደም ዚብል ተጻሒፉ ኣሎ።
ብፍሉይ ከኣ ኣብ ምዕራፍ ትሽዓተ ዓሠርተው ክልተ ሳዕ ደም ዚብል ቓል ተጠቒሱ ይርከብ። ኣገዳስነት እዚ ቓል ብዘይመጠን ልዑል እዩ፡
ኣገዳስነቱ ኸኣ ምስ ነገረ-ድኅነት(ሥርየት ኃጢኣት) ዝተሓሓዝ እዩ። ሓዋርያ ቅዱስ ጳውሎስ ብዓቢይ ዕላማ ብመርሒነት መንፈስ ቅዱስ
ተደሪኹ ምጽሓፉ ኸኣ እነሆ እቲ ትኅዝቶ ይምስክር። ናይ ኢየሱስ ክርስቶስ መንጐኛኘት፡ኣብታ መጺኣ ዘላ ዝበለጸት ኪዳን እዩ። ንሱ
ከምቶም ቀዳሞት ካህናት ደም ድቤላታትን ምራኹትን ብምሓዝ ዘይኮነስ፡ ገዛእ ርእሱ ኣብ ቅድሚ ኣቦ ብምቕራብ፡ ዘለኣለማዊ ደም ብምኃዝ
እዩ ናብታ ሰማያዊት መቕደስ ኣትዩ። ናይ ዕብራውያን ጸሓፊ ኢየሱስ መንጐኛ ዝኾነሉ ምኽንያት ክገልጽ ከሎ ከምዚ ይብል፡ በዚ ምኽንያት
እዚ ክርስቶስ ናይዛ ሓዳስ ኪዳን እዚኣ መንጐኛ ኾነ(ዕብ 9፡15)። ክርስቶስ ናይ ሓዲስ ኪዳን መንጐኛ ዝዀነሉ ምኽንያት’ከ እንታይ
እዩ? መንጐኛ ንምዃን ዘብቕዕ ነገር እንታይ እዩ? ዚብሉ ሕቶታት ክፍጠሩ ናይ ግድን እዩ። ሓዋርያ ኸኣ ከምዚ ይብለና፦ ደም ድቤላታትን
ኣራሑን፡ ሓሙዂሽቲ ናይታ ዝሓረረት ኣርሕን ኣብቶም ዝረኸሱ ተነጺጉ ሰብነቶም ኬንጽህ ዚቕድሶም ካብ ኮነ፡ ደም እቲ ብዘለዓለማዊ
መንፈስ ገይሩ ገዛእ ርእሱ ብዘይ ኣበር ንእግዚኣብሔር ዘቕረበ ክርስቶስ ግዳ፡ ነቲ ሕያው ኣምላኽ ምእንቲ ኸነገልግል፡ ንሕልናና
ካብቲ ሞት ዜስዕብ ግብሪ ክንደይ ኣዝዩ ዘየንጽሖ? (ዕብ 9፡13-14) ። ኢየሱስ መንጐኛ ተባሂሉ ክስመ ዝኸኣለ ብምኽንያት ደሙ
እዩ። ስለዚ ኸኣ መንጐኛ ንምዃን ምሕራድ ወይ ምሥዋዕ ናይ ግድን እዩ። ኢየሱስ ክርስቶስ ነዚ ዕዮ እዚ ሓንሳእን ንሓዋሩን ፈጺምዎ
እዩ፡ ብምኽንያት ደሙ ንሱ ናይታ ሓዳሽ ኪዳን መንጐኛ፡ ሊቀ ካህናት ኣተዓራቒ ኮነ፡ ነቶም ብእኡ ኣቢሎም ናብ ኣቦ ዚመጹ ኸኣ ንዘለዓለም
ኪማልድ ዚነብር፡ ብሞት ክግደብ ዘይክእል እሙን ሊቀ-ካህናት እዩ። እቲ እንኮ መንጐኛ ሓድሽ ኪዳን ኢየሱስ ወዲ ህያው ኣምላኽ እዩ፡
ከቶ ውን ካልእ መንጐኛ የለን። ልብታትና ነዚ መለኮታዊ መልእኽቲ ክኣምንን ክቕበልን፡ ከንቱ ካብ ዝዀኑ ትምህርታት ብምርሓቕ፡ እምንቶና
ኣብቲ ሓደ መንጐኛ ሓድሽ ኪዳን ዝኾነ ኢየሱስ ክርስቶስ ክንገብር ይግባእ። ጸጋ ጐይታ ኢየሱስ ክርስቶስ ምስ ኩላትና ይኹን።
